Mjukt når vi møtast

Mi kjære May Beate, eller mama-may som ho gjerne vert kalla, flyttar frå meg i dag, og vekk frå Bergen. Etter 4 1/2 år som sambuarar er det på tide å skiljast. Ho skal ut i den store verda på nye oppdagingar.

Me har opplevd utruleg mykje kjekt desse åra, og det vert sjølvsagt vemodig når ho reiser. Så eg vil berre benytte anledninga til å takke deg Maybi for alt du har bidrege med i kvardagen min så langt! Så sjåast vi igjen om ikkje så alt for lenge håpar eg!

Og tittelen på innlegget treng de ikkje bry dokke om, det er berre ein intern greie mellom meg og Maybi..

Lukta av jul

Dei i første etg. har laga julemiddag i dag, og lukta siv oppover til oss. Det vil seie at julesteminga kjem anten ein vil eller ikkje. Har vore mykje heimesitting på meg i det siste, er ikkje heilt i form. Men satsar på det kjem seg snart!  Kom forresten over denne gamle barne tv-introen på youtube, frå jula når vi var små. Nostalgi.

Sufjan i julesteming

Denne teiknefilmen/musikkvideoen frå Sufjan Stevens er ei kjekk lita juleperle. Klikk på den og sjå/høyr :)

Julefryd og fred

Første søndag i advent er over. Me tende lys og song. Fekk lys i både stjerne og stake. Har ete mandarinar og drukke gløgg. Og i dag er det 1 desember, og kalendaren kan opnast.  Det er ei travel tid som ventar, men det er viktig å ikkje la seg kave opp og stresse, ro heller med meg litt god julemusikk og ei peparkake ;)

Adventstida er ei fin tid. Særleg når ein ikkje har eksamenar eller oppgåver å levere. Og i år vert det til og med ein skikkeleg juleferie heime med familia, i motsetnad til i fjor då eg var i Bergen på jobb..

Illustrasjonen er henta frå Panduro, der ein kan finne mykje inspirasjon i desse førjulstider

Pass deg for grisen

Ein skal sjølvsagt ikkje spøke med svineinfluensaen og dei som har vorte alvorleg sjuke av den. Men det er inga tvil om at media har gått litt over stokk og stein i si framstilling. Uansett, synast eg denne blekka frå The Telegraph var litt kul.

Herliga london!

I helga var T. og eg i London på førjulstur. Fekk oppleve mykje kjekt, her er eit lite knippe bilete.

Utsikta frå hotellet; The Tower Bridge

Frå markedet i Nothing Hill

Posering med kjendisane på Madame Tussauds

Løvenes konge musical – eit av høgdepunkta :)

Martine stortrivast i den norske sjømannskyrkja

Haustveir

I dag er det skikkeleg haustveir ute. Med mykje vind og mykje regn. Nedanfor ser du kanskje ikkje den beste illustrasjonen. Men regnbiletet av sauene er allereie brukt opp, så då får vinden stå for tur.

I slikt veir er det best å halde seg inne. Og kveikje teljos. Og drikke kaffi medan ein kosar seg med besøk og brownies. Hausten kan vere rett så triveleg også.

Julegåveliste 2009

Jula nærmar seg, og eg har allereie fått mange spørsmål om kva eg ønskar meg. Eigentleg skulle eg gjerne berre ha sagt “snille ungar”, slik som alle vaksne gjer, men dette er ikkje akkurat aktuelt. Eg har i midlertid nokre ting eg kunne trenge, og sjølvsagt kanskje ting som er midnre viktige. Men heldigvis er ting og gåver ikkje det vesentlege her i livet.

Etter litt press, har eg no bestemt meg for å leggje ut ønskelista mi på nett. Litt vanskeleg, sidan det på ein måte går i mot mine prinsipp mot det kapitalistiske jaget og den store kjøpefesten som jula er. Men på den andre sida, er eg så priviligert å ha nokon som uansett kjem til å kjøpe gåver til meg. Og då er det kanskje betre at det er ting ein kan ha meir bruk for. Men det må presiserast at ALT takast i mot ved hjarteleg takk! Og gjerne heimelaga, gjenbruk eller gåver til andre som har det dårlegare enn meg! 
Uansett, lukke til med alle førebuingar som skal gjerast. På dagen 2 månadar igjen no ;)

1. Nye fjelljoggesko (etter mange års bruk går mine gamle straks i oppløysing)

2. Ymse spel (td. kunnskapsspel, passport, bohnanza, ticket to ride som nokre døme)

3.  Wokpanne

4. Ei gåve for kan forandre verda (td. Kirkens Nødhjelp , Redd Barna eller Kirkens Bymisjon)

5. Heimelaga er alltid bra! (Eit heitt tips er at eg manglar tøfler no i desse kalde tider)

6. Primus og bålsteikepanne

7. Hobbybøker, klassikarar eller andre kjekke bøker

8. Kunstbilete (Kristine tipsa meg om kunstnaren Rigel Suari, sjekk ut eit av mine favorittar her.)

9.  Swiss kniv/leathermankniv, i ekte MacGyver-stil

10. Vaffeljarn (for å glede dei rundt meg)