Atter ein gong har kvardagen kome snikande, og ferien er over for denne gong. Det var litt vemodig å reise frå heimbygda i dag i dette fine veiret:
Det har vore både fine soldagar og ikkje like fine dagar, med vind og tett snøkave. På desse dagane er det best å vere innandørs og kose seg:
Herlige, late dagar på hytta på Mosetra. Strevsamt å kome seg opp og fram med ekstreme 2,0 m til 2, 70 m med snø utanfor hytteveggen.
Den nye turistatraksjonen i bygda måtte vitjast i påska; verdas djupaste undersjøiske tunnel. Det er kjekt å kunne ta seg ein tur til Ulsteinvik og Hareid utan å måtte ta ferja. Og for ambulansen og dagpendlarane er Eiksundsambandet ei velsigning. Den beine strekninga med ei stigning på 9,6 prosent virka ikkje så bratt som ein skulle tru. Ikkje eingong eit skilt i botnen av tunnelen som viste at me no var komne 287 meter under havet. Men på den andre sida er dette ganske forståeleg. Å ha skilt, bilete og kart, og kanskje til og med nokre rasteplassbord der nede ville vel ikkje ha vore så veldig trafikksikkert. Elles er me ganske vant med å køyre tunnelar rundt om på vestlandet, så sambandet i seg sjølv skapte ikkje store overraskingar. Men det har i alle fall positive konsekvensar for kommunene rundt. Og ikkje for å gløyme den “infrablå” linja som markerte når me kom under havet si overflate. Den var i alle fall snedig.
I dag har vore ein dag der alt er farga av vårsola. Der eg ser alt det gode i ting rundt meg.
Å tusle rundt på torgalmenningen og sjå smilande ansikt. Drikke kaffi med gode vener. Å hande gåver du veit vil gjere andre glade. Å lage heimelaga øyredobbar. Høyre på musikk, og samstundes sjå opp på himmelen. Det kan kanskje høyrast naivt ut, men det utløyser i alle fall mine endorfinar. Slike dagar er herlige. Å vere i feriemodus er godt.
I’ve got so much beauty around me, I can’t look (Damien Rice)
Det var ikkje store oppslutnaden på spørjetevlinga. Heldigvis, kan ein vel seie til det. Det viser at folk har andre ting enn å sitje å kommentere på bloggen… Og ingen ting er vel betre enn det!?
No vil eg likevel leggje ut bilete augene var teikna ut i frå… Og ja, augene var mine berre til opplysning.
Påska nærmar seg. Faktisk har eg ferie no. Men har sett meg opp på ekstravakter her i Bergen i helga, så det vert ikkje heimreise før måndag. Gler meg til påskefjellet og til å sjå familien att!
Etter at eg hadde lagt meg i går, fekk eg ein plutseleg trang til å teikne. Kvifor akkurat då? Eg skulle opp tidlegare enn klokka 06 neste dag for å gå på jobb. Men likevel måtte eg berre teikne noko. Av ein eller annan grunn vart det eit par auger.
No skal det seiast at eg teikna desse augene etter eit bilete av nokon sine auger. Og nettopp difor vert spørsmålet til deg; Kven er dette sine auger?
Har du eit forslag, så kom med det! :) Fasiten vert lagt ut etterkvart..
